शिर्डी लोकसभा मतदार संघामधून ना.रामदास आठवले यांची उमेदवारी जाहीर करून भाजपाने युती धर्माचे पालन करावे अन्यथा अपक्ष उमेदवारी करणार असे मत रिपाईचे राज्य सचिव तथा जिल्हा परिषद माजी सदस्य दिपकराव गायकवाड यांनी प्रसिद्धीस दिलेल्या पत्रकात व्यक्त केले आहे.
ते पुढे म्हणाले की, नुकतीच कोपरगाव तालुक्यात आर पी आय व रिपब्लिकन सेनेच्या बैठकीमध्ये ना आठवले यांना उमेदवारी मिळण्यासंदर्भात सांशकता असल्याने मी अपक्ष उमेदवार म्हणून अर्ज भरावा अशी इच्छा कार्यकर्त्यांनी व्यक्त केली. ना आठवले यांची उमेदवारी जाहीर न केल्याने कार्यकर्त्यांमध्ये संभ्रम निर्माण होतो आहे व कार्यकर्त्यामधून नाराजीचा सूर दिसून येत आहे. शिर्डी लोकसभा मतदार संघामध्ये बौध्द समाजाचे मतदान निर्णायक असून ना. आठवले यांना मानणारा वर्ग मोठ्या प्रमाणावर आहे. त्यामुळे भाजपाने ना. आठवले व आर पी आय मित्रपक्षाला गृहीत न धरता ना. आठवलेंची उमेदवारी लवकर जाहीर करावी, अन्यथा रिपब्लिकन पक्षाचे वतीने विचारपूर्वक पुढील भूमिका जाहीर करण्यात येईल, असा इशारा गायकवाड यांनी दिला आहे
