“शिर्डी लोकसभा लढविण्यासाठी मी प्रयत्न करत होतो. माझ्या राज्यसभेची मुदत 2026 पर्यंत आहे. पण, माझा चेहरा लोकसभेचा असल्यानं निवडून जावं, असं मला वाटत होतं. मात्र, शिर्डीची जागा मला मिळाली नाही. राधाकृष्ण विखे-पाटलांनी मला शिर्डीतून तिकीट मिळू नये, यासाठी पत्र लिहिलं होतं,” असा गौप्यस्फोट आठवलेंनी यांनी एका मुलाखतीत  केला आहे.

“पंढरपूरमधून दोनवेळा लोकसभेला”

रामदास आठवले म्हणाले, “2009 मध्ये शिर्डीतून मी पराभूत झालो नव्हतो, तर पाडण्यात आलं होतं. पराभूत होणं हे आयुष्यात मला कधी माहिती नव्हतं. उत्तर मध्य मुंबईत शिवसेनेचा गड असतानाही काँग्रेसच्या आघाडीत मी निवडून आलो होतो. त्यानंतर राष्ट्रवादी आणि काँग्रेसच्या आघाडीत पंढरपूरमधून दोनवेळा लोकसभेला निवडून गेलो.”

“विखे-पाटलांच्या कुटुंबानं माझ्या विरोधात प्रचार केला”

“बाळासाहेब विखे-पाटील यांचा आग्रह होता की मी शिर्डीतून निवडणूक लढवली पाहिजे. तर, नगर लोकसभा मतदार संघातून बाळासाहेब विखे-पाटलांना उभे राहायचं होतं. पण “राष्ट्रवादीनं ती जागा बाळासाहेब विखे-पाटलांना दिली नाही. त्यामुळे 2009 मध्ये विखे-पाटलांच्या कुटुंबानं माझ्या विरोधात प्रचार केला. मात्र, शरद पवारांना मानणाऱ्या वर्गाकडून सुद्धा आम्हाला प्रतिसाद मिळाला नाही. शरद पवार प्रामाणिक होते, त्यांनी माझा प्रचार केला. मात्र, स्थानिक पातळीवर माझ्याविरोधात वातावरण तयार करून पराभव करण्यात आला,” असं आठवलेंनी सांगितलं.