आमदार सत्यजीत तांबे यांच्या पाठपुराव्याला मोठे यश

अहिल्यानगर । झुंझार न्यूज

संगमनेर तालुक्यातील धार्मिक आणि आध्यात्मिक वारसा जतन करण्याच्या दृष्टीने एक अत्यंत महत्त्वाचा निर्णय शासनाने घेतला आहे. आमदार सत्यजीत तांबे यांच्या सातत्यपूर्ण पाठपुराव्यामुळे तालुक्यातील श्री क्षेत्र खंडोबा देवस्थान (खळी) आणि श्री क्षेत्र विठोबा देव मंदिर (धांदरफळ बु.) या दोन महत्त्वाच्या देवस्थानांना शासनाकडून ‘क’ वर्ग तीर्थक्षेत्राचा दर्जा मंजूर करण्यात आला आहे. अहिल्यानगर जिल्हाधिकारी कार्यालयात झालेल्या जिल्हा नियोजन समितीच्या बैठकीत या निर्णयावर शिक्कामोर्तब करण्यात आले.

पर्यटनाला मिळणार नवी उभारी

संगमनेर तालुक्यात अनेक प्राचीन आणि जागृत देवस्थाने आहेत. त्यामध्ये खळी येथील खंडोबा मंदिर आणि धांदरफळ येथील विठोबा मंदिर ही भाविकांची श्रद्धास्थाने आहेत. या देवस्थानांना ‘क’ वर्ग तीर्थक्षेत्राचा दर्जा मिळाल्यामुळे आता या परिसरातील धार्मिक पर्यटनाला मोठ्या प्रमाणावर चालना मिळणार आहे. शासनाच्या या निर्णयामुळे स्थानिक ग्रामस्थांमध्ये आनंदाचे वातावरण पसरले आहे.

‘क’ वर्ग तीर्थक्षेत्राचा दर्जा प्राप्त झाल्यामुळे आता या दोन्ही देवस्थानांच्या विकासासाठी जिल्हा नियोजन समितीच्या माध्यमातून तसेच तीर्थक्षेत्र विकास योजनेतून स्वतंत्र निधी उपलब्ध होणार आहे. या निधीतून मंदिर परिसरात भाविकांसाठी खालील सुविधा निर्माण केल्या जातील:

स्वच्छतागृह आणि पिण्याच्या पाण्याची दर्जेदार सोय.
मंदिराकडे जाणारे अंतर्गत रस्ते आणि परिसर सुशोभीकरण.
विद्युत व्यवस्था आणि पुरेशा प्रकाश व्यवस्थेची उभारणी.
मोठ्या कार्यक्रमांसाठी सभामंडप आणि भाविकांच्या निवासासाठी भक्तनिवास.
सुरक्षिततेच्या दृष्टीने विविध उपाययोजना.

या महत्त्वपूर्ण निर्णयाची दखल घेत आमदार सत्यजीत तांबे यांनी राज्याचे महसूलमंत्री तथा जिल्ह्याचे पालकमंत्री राधाकृष्ण विखे पाटील यांचे विशेष आभार मानले आहेत. तालुक्याच्या विकासासाठी आणि भाविकांच्या सोयीसाठी हा निर्णय अत्यंत कळीचा ठरणार असल्याचे त्यांनी यावेळी नमूद केले.

तीर्थक्षेत्राचा दर्जा मिळाल्यामुळे केवळ मंदिराचा विकास होणार नाही, तर दर्शनासाठी येणाऱ्या भाविकांची संख्या वाढल्याने स्थानिक तरुणांना रोजगाराच्या नव्या संधी उपलब्ध होतील. छोटे व्यावसायिक, हार-फुले विक्रेते आणि वाहतूकदारांना याचा मोठा फायदा होणार असून ग्रामविकासाला आणि स्थानिक अर्थकारणाला सकारात्मक चालना मिळणार आहे.
या यशाबद्दल धांदरफळ व खळी येथील ग्रामस्थांनी, यात्रा कमिटीच्या पदाधिकाऱ्यांनी आणि भाविकांनी आमदार सत्यजीत तांबे यांचे मनापासून आभार मानले आहेत.

“लोकनेते बाळासाहेब थोरात यांनी तीर्थक्षेत्रांच्या विकासासाठी संगमनेर तालुक्यातील प्रत्येक गावात महत्त्वपूर्ण योजना राबवून आध्यात्मिक वारसा जपण्याचे काम केले आहे. श्री क्षेत्र खंडोबा आणि श्री क्षेत्र विठोबा धांदरफळ ही संगमनेर तालुक्यातील महत्त्वाची श्रद्धास्थाने आहेत. या तीर्थक्षेत्रांना ‘क’ वर्ग दर्जा मिळाल्यामुळे देवस्थान पर्यटनाला मोठी चालना मिळेल आणि भाविकांची गैरसोय दूर होईल.”

– आमदार सत्यजीत तांबे