खेळाडूंचा उत्साह वाढवण्यासाठी अर्जुन पुरस्कार विजेते व भारतीय कबड्डी संघाचे माजी कर्णधार पंकज शिरसाठ, शिवछत्रपती पुरस्कार विजेती खो-खो पटू श्वेता गवळी आणि बेसबॉल पटू अक्षय आव्हाड हे नामवंत खेळाडू विशेष अतिथी म्हणून उपस्थित राहणार आहेत.

दरवर्षी आयोजित केल्या जाणाऱ्या या प्रतिष्ठेच्या क्रीडा स्पर्धांचे यजमानपद यंदा अहिल्यानगर जिल्ह्याकडे आले आहे. गोदावरी पाटबंधारे विकास महामंडळाने या स्पर्धांचे नियोजन अत्यंत नेटके केले आहे. राज्यभरातील विविध विभागांतून हजारो कर्मचारी या स्पर्धेत सहभागी होण्यासाठी लोणीत दाखल होणार आहेत.

स्पर्धेचा समारोप आणि पारितोषिक वितरण सोहळा रविवार, ९ फेब्रुवारी रोजी शिर्डी येथील शासकीय प्रशिक्षण संस्थेत पार पडेल. या कार्यक्रमासाठी नामवंत धनुर्विद्या प्रशिक्षक डॉ. शुभांगी दळवी, वेटलिफ्टर कोमल वाकळे आणि सॉफ्टबॉल पटू फिजा सय्यद यांची विशेष उपस्थिती असणार आहे. विजेत्या खेळाडूंना मान्यवरांच्या हस्ते गौरवण्यात येईल.

या भव्य क्रीडा महोत्सवाच्या यशस्वीतेसाठी जलसंपदा विभागाने विविध समित्या स्थापन केल्या आहेत. या नियोजनात प्रवरा ग्रामीण शिक्षण संस्थेच्या क्रीडा विभागाने मोलाचे सहकार्य केले आहे. लोणी आणि शिर्डी ही दोन्ही शहरे या क्रीडा उत्सवासाठी सज्ज झाली असून, क्रीडा प्रेमींमध्ये मोठा उत्साह पाहायला मिळत आहे.