मुंबई । झुंझार न्यूज
देशाची आर्थिक राजधानी असलेल्या मुंबई महानगरपालिकेच्या महापौरपदी भारतीय जनता पार्टीच्या ज्येष्ठ नगरसेविका श्रीमती रितू तावडे यांची निवड झाली आहे. ‘विजय भाजपा, निश्चय भाजपा’चा नारा देत भाजपने मुंबई महापालिकेवर आपले वर्चस्व सिद्ध केले असून, रितू तावडे यांच्या रूपाने मुंबईला एक अभ्यासू आणि आक्रमक चेहरा मिळाला आहे.
पंतप्रधान मोदी आणि फडणवीस यांच्या नेतृत्वावर विश्वास
रितू तावडे यांच्या निवडीनंतर राजकीय वर्तुळातून त्यांच्यावर अभिनंदनाचा वर्षाव होत आहे. ही निवड म्हणजे पंतप्रधान नरेंद्र मोदी यांचे दूरदर्शी नेतृत्व आणि उपमुख्यमंत्री देवेंद्र फडणवीस यांच्या मार्गदर्शनाखालील ‘विकसित मुंबई, सुरक्षित मुंबई’ या संकल्पाची पुढची पायरी असल्याचे मानले जात आहे. मुंबईकरांच्या हिताला सर्वोच्च प्राधान्य देऊन, आधुनिक पायाभूत सुविधा आणि पारदर्शक प्रशासन देण्याचे आश्वासन भाजपच्या वतीने देण्यात आले आहे.
कोण आहेत रितू तावडे?
मुंबईच्या नव्या महापौर रितू तावडे यांचा राजकीय प्रवास अत्यंत प्रभावी राहिला आहे. त्यांच्याबद्दलच्या काही महत्त्वाच्या बाबी
-
प्रभाग आणि अनुभव: रितू तावडे या मुंबई महापालिकेच्या प्रभाग क्रमांक १३२ च्या भाजप नगरसेविका आहेत. त्यांनी दोन टर्म नगरसेविका म्हणून महापालिकेत काम केले आहे.
-
सामाजिक समीकरण: घाटकोपरमधील गुजराती बहुल भागात एक ‘मराठी चेहरा’ म्हणून त्यांची स्वतंत्र ओळख आहे. त्यांनी सर्वधर्मीय आणि सर्वभाषिक मतदारांमध्ये आपली पकड निर्माण केली आहे.
-
प्रशासकीय अनुभव: त्यांनी यापूर्वी मुंबई महानगरपालिकेच्या अत्यंत महत्त्वाच्या असलेल्या ‘शिक्षण समिती’चे अध्यक्षपद भूषवले आहे. तसेच स्थापत्य समितीच्या (शहर) उपाध्यक्षा म्हणूनही त्यांनी कामाचा ठसा उमटवला आहे.
-
आक्रमक नेतृत्व: रितू तावडे यांची ओळख भाजपचा ईशान्य मुंबईतील एक आक्रमक चेहरा म्हणून आहे. सर्वसामान्यांच्या प्रश्नावर त्या नेहमीच तत्पर असतात. विशेषतः वीज दरवाढीविरोधात त्यांनी केलेले आंदोलन अत्यंत गाजले होते.
मुंबईकरांसाठी नवा अजेंडा
महापौरपदाची सूत्रे हाती घेतल्यानंतर, मुंबईला जागतिक स्तरावरील एक अग्रगण्य आणि ‘स्मार्ट’ महानगर बनवणे हे रितू तावडे यांचे मुख्य उद्दिष्ट असणार आहे. मुंबईतील वाहतूक कोंडी, रस्ते, पाणी आणि सुरक्षा यांसारख्या मूलभूत प्रश्नांवर भर देत, मुंबईकरांचे जीवन अधिक समृद्ध आणि सुरक्षित करण्याचा मानस त्यांनी व्यक्त केला आहे.