शेतकऱ्यांना वेळेवर युरिया खताचा पुरवठा, संस्थेच्या आवारातील नाश्ता गाड्यांचा स्वतंत्र हिशोब व दिवाळी भेट देण्याची नानासाहेब शिंदे पाटील यांची निवेदनाद्वारे परखड मागणी

शिर्डी । झुंझार न्यूज

तीर्थक्षेत्र शिर्डी येथील नामांकित ‘शिर्डी विविध कार्यकारी सेवा सहकारी सोसायटी’च्या विद्यमान पदाधिकाऱ्यांच्या मनमानी कारभाराविरोधात सभासदांमधून तीव्र संताप व्यक्त होत आहे. संस्थेच्या मालकीचे असणारे बहुमूल्य व्यावसायिक गाळे बाहेरील व्यक्तींना भाडेतत्त्वावर न देता संस्थेच्या स्थानिक सभासदांना किंवा त्यांच्या मुलांना व्यवसाय करण्यासाठी प्राधान्याने वाटप करावेत, अशी जोरदार व परखड मागणी सोसायटीचे निष्ठावंत सभासद तथा भाजपचे प्रांतिक सदस्य श्री. नानासाहेब शिंदे पाटील यांनी अधिकृत निवेदनाद्वारे केली आहे.

स्थानिक तरुणांना रोजगाराची संधी आणि संस्थेचा पैसा संस्थेतच!

निवेदनात श्री. नानासाहेब शिंदे पाटील यांनी म्हटले आहे की, शिर्डी हे आंतरराष्ट्रीय ख्यातीचे श्रद्धास्थान असल्याने संस्थेच्या व्यापारी संकुलातील गाळ्यांना प्रचंड व्यावसायिक महत्त्व व मागणी आहे. मात्र संस्थेचे पदाधिकारी हे व्यावसायिक गाळे स्थानिक मूळ सभासदांना डावलून बाहेरील लोकांना देत असल्याचा सूर उमटत आहे. जर हे गाळे गावातील सभासदांच्या सुशिक्षित बेरोजगार मुला-मुलींना देण्यात आले, तर स्थानिक तरुणांना गावातच स्वाभिमानाने उपजीविका व रोजगाराची हक्काची संधी मिळेल. एवढेच नव्हे, तर या व्यापारातून फिरणारे भांडवल आणि संस्थेचा पैसा संस्थेच्या हद्दीतच व सभासदांच्या कुटुंबातच राहील, असा ठाम युक्तिवाद शिंदे पाटील यांनी केला आहे.

शेतकऱ्यांना वेळेवर व रास्त दरात युरिया खताची उपलब्धता हवी

शेतकऱ्यांच्या शेती प्रश्नांवर अंगुलीनिर्देश करताना निवेदनात पुढे नमूद केले आहे की, शिर्डी विकास सोसायटीची स्थापनाच मुळात शेतकरी बांधवांना सहकार्य करण्यासाठी झाली आहे. सध्याच्या कृषी हंगामात पिकांसाठी रासायनिक खतांची, विशेषतः ‘युरिया’ खताची मोठी गरज असते. मात्र खतांच्या कृत्रिम टंचाईमुळे अथवा वेळेवर उपलब्धतेअभावी स्थानिक शेतकरी सभासदांना नाहक आर्थिक भुर्दंड सहन करावा लागतो आणि त्यांची गैरसोय होते. यावर तोडगा म्हणून संस्थेने स्वतः पुढाकार घेऊन थेट मुबलक प्रमाणात युरिया खताचा साठा करावा आणि तो सभासदांना वेळेवर व रास्त दरात उपलब्ध करून द्यावा, अशी आग्रही मागणी करण्यात आली आहे.

नाश्त्याच्या गाड्यांच्या उत्पन्नाची स्वतंत्र नोंद वार्षिक अहवालात प्रसिद्ध करा

संस्थेच्या कारभारातील आर्थिक पारदर्शकतेवर बोट ठेवताना नानासाहेब शिंदे यांनी महत्त्वाचा मुद्दा उपस्थित केला आहे. संस्थेच्या विस्तीर्ण प्रांगणामध्ये दररोज सायंकाळच्या वेळी अनेक खाद्यपदार्थ व नाश्त्याच्या गाड्या लागतात. या गाड्यांमधून संस्थेला नेमके किती उत्पन्न मिळते? किती गाड्यांना परवानगी देण्यात आली आहे? याची कोणतीही ठोस आकडेवारी सभासदांसमोर ठेवली जात नाही. त्यामुळे या सर्व नाश्त्याच्या गाड्यांची स्वतंत्र अधिकृत नोंदवही ठेवून, त्यातून मिळणाऱ्या प्रत्येक पैशाचा जमा-खर्च संस्थेच्या दरवर्षी निघणाऱ्या वार्षिक अहवालात स्पष्टपणे प्रसिद्ध करावा, जेणेकरून संस्थेच्या कारभारात १०० टक्के पारदर्शकता राहील आणि संशयाचे मळभ दूर होईल.

दिवाळी सणानिमित्त सर्व सभासदांना मिठाई व चिवडा भेट द्या!

सभासदांच्या हक्काविषयी भावना व्यक्त करताना निवेदनात म्हटले आहे की, शिर्डी सोसायटी ही सर्वसामान्य शेतकरी व सभासदांच्या घामावर आणि सहकार्यावर उभी राहिलेली संस्था आहे. त्यामुळे महाराष्ट्राचा सर्वात मोठा सण असलेल्या दिवाळी सणाचे औचित्य साधून दरवर्षी संस्थेने सर्व सभासदांना मिठाई आणि दर्जेदार चिवड्याचे सप्रेम भेट म्हणून वाटप करावे. यामुळे ऐन दिवाळीत हजारो सभासदांच्या कुटुंबात आनंदाचे व गोडवा निर्माण होईल आणि संस्थेबद्दल सभासदांच्या मनात प्रेम व आपुलकी वृद्धिंगत होईल.

आगामी वार्षिक सर्वसाधारण सभेकडे सर्वांचे लक्ष

श्री. नानासाहेब शिंदे पाटील यांनी शिर्डी विकास सोसायटीचे अध्यक्ष, उपाध्यक्ष, संचालक मंडळ आणि सचिव यांना हे सविस्तर निवेदन सादर केले आहे. या सर्व रास्त आणि लोकहितैषी मागण्यांवर आगामी सर्वसाधारण सभेत संचालक मंडळाने सकारात्मक विचार करून तात्काळ अंमलबजावणी करावी, अशी ठाम अपेक्षा त्यांनी व्यक्त केली आहे. जर पदाधिकाऱ्यांनी या मागण्यांकडे दुर्लक्ष केले किंवा मनमानी कारभार सुरूच ठेवला, तर सभासदांच्या हक्कासाठी तीव्र लढा उभारला जाईल, अशी चर्चा आता शिर्डीच्या राजकीय व सहकार वर्तुळात रंगू लागली आहे.

“संस्थेच्या मालकीचे गाळे हे सभासदांच्या कष्टाच्या पैशातून उभे राहिले आहेत. ते बाहेरील लोकांना न देता स्थानिक सभासदांना किंवा त्यांच्या मुलांना व्यवसाय करण्यासाठी प्राधान्याने द्यावेत. यामुळे स्थानिक तरुणांना हक्काचा रोजगार मिळेल आणि संस्थेचा पैसा संस्थेतच राहील. तसेच शेतकऱ्यांना युरिया खत वेळेवर उपलब्ध करून द्यावे आणि नाश्ता गाड्यांच्या उत्पन्नाची नोंद वार्षिक अहवालात द्यावी.”

श्री. नानासाहेब शिंदे पाटील

सभासद : शिर्डी विकास सोसायटी, शिर्डी तथा प्रांतिक सदस्य, भाजप