मुंबई : झुंजार न्यूज
मास्टर ब्लास्टर सचिन तेंडुलकरची वचनपूर्ती! ताडोबातल्या शाळकरी मुलांना दिलं ‘हे’ स्पेशल गिफ्ट
सचिन दोन महिन्यांपूर्वी २१ फेब्रुवारी रोजी पत्नी अंजली व मित्रांसमवेत ताडोबात व्याघ्र सफारीसाठी आला असता अलीझंझा जिल्हा परिषद प्राथमिक शाळेला भेट दिली होती.
एखाद्याला दिलेल्या वचनाची पूर्तता करण्यास अनेकजण कामाच्या व्यापात विसरून जातात. सेलिब्रेटीच्या बाबतीत हा प्रकार नेहमीच होत असल्याचा आजवरचा अनुभव आहे.मात्र ताडोबा-अंधारी व्याघ्र प्रकल्पातील अलीझंझा जिल्हा परिषद शाळेच्या विद्यार्थ्यांना गणवेश, पुस्तके आणि स्कूल बॅग भेट स्वरूपात देण्याचे अभिवचन मास्टर ब्लास्टर सचिन तेंडुलकर व पत्नी अंजली यांनी दिले होते.
मास्टर ब्लास्टर सचिन तेंडुलकर दोन महिन्यांपूर्वी २१ फेब्रुवारी रोजी पत्नी अंजली व मित्रांसमवेत ताडोबात व्याघ्र सफारीसाठी आला असता अलीझंझा जिल्हा परिषद प्राथमिक शाळेला भेट दिली होती. तेव्हा विद्यार्थ्यांनी चौथ्या वर्गाच्या मराठीच्या पुस्तकात असलेला कोलाज नावाचा धडा सचिनची बायोग्राफी वाचून दाखवली होती. स्वत:ची बायोग्राफी विद्यार्थी वाचत असताना सचिन भावूक झाला होता. तेव्हा सचिनची पत्नी डॉ. अंजली हिने शाळेतील विद्यार्थांना गणवेश, स्कूल बॅग देण्याचे कबूल केले होते.
विद्यार्थ्यांना दिलेले आश्वासन पूर्ण करण्याच्या दृष्टीने शुक्रवारी दुपारी ३ वाजता अलीझंझाच्या जि. प. शाळेत सचिन व पत्नी डॉ. अंजली व मित्र यांनी दोन महिन्यानंतर भेट देत विद्यार्थ्यास स्कूल बॅग दिली व विद्यार्थ्यांशी संवाद साधला.
सचिन विद्यार्थ्यांच्या भेटीसाठी येणार असल्याने विद्यार्थी व शिक्षकाने शाळेत रांगोळी व फुलांनी सजवली होती. सचिन शाळेत येताच शाळेतील विद्यार्थिनी व शिक्षिका मनीषा बावणकर यांनी पारंपरिक पद्धतीने लाकडी पाटावर पाय धुतले व औक्षवण करत पुष्पगुच्छ दिले.
ताडोबा-अंधारी व्याघ्र प्रकल्पाला लागून अलीझंझा गाव आहे. गावाची लोकसंख्या ३०० च्या घरात आहे.
गेटकडे जाण्याच्या मार्गावर जिल्हा परिषदेची प्राथमिक शाळा आहे. या शाळेत सध्या सतरा विद्यार्थी आहेत. फेब्रुवारी महिन्यात याच मार्गाने सफारीला जाताना विद्यार्थी खेळताना सचिनला दिसले. त्यांनी गाडी थांबवून शाळेला भेट दिली होती. दरम्यान, विद्यार्थ्यांनी सचिनच्या जीवन चरित्रावर आधारित चौथ्या वर्गाच्या मराठीच्या पुस्तकात असलेला कोलाज नावाचा धडा वाचून दाखवला होता.
शुक्रवारी याची आठवण करत सचिनने पुन्हा विद्यार्थ्यांशी संवाद साधत स्कूल बॅग व साहित्य भेट दिली. बॅग मध्ये काही साहित्य आहे बॅग आणि साहित्याचा वापर शाळेसाठी करा बरोबर करा असे सांगत खूप शिका असे बोलले. लगेच पंधरा मिनिटानी अलीझंझा गेटमधून सफारीला निघाले. दरम्यान. जि. प. प्राथमिक शाळेने छोटेखानी कार्यक्रम ठेवला होता.