कोलंबो । झुंजार न्यूज
लोकेश राहुलचे धडाकेबाज कमबॅक आणि विराट कोहलीची दणकेबाज फटकेबाजी पाहण्याचा योग पाकिस्तानविरुद्धच्या सामन्यात आला. राहुलने यावेळी दणक्यात कमबॅक केले आणि टीकाकारांना चोख उत्तर दिले. दुसरीकडे विराटही धमाकेदार फटकेबाजी करत होता. या दोघांच्या दमदार शतकांच्या जोरावर भारताना पाकिस्तानविरुद्धच्या सामन्यात धावांचा डोंगर उभारला आहे. राहुल आणि विराट या दोघांनीही यावेळी आपली शतके पूर्ण करत भारताच्या धावसंख्येला चांगला आकार दिला. या दोघांनी यावेळी द्विशतकी भागीदारीही रचली. भारताने यावेळी ३५६ धावांचा डोंगर रचला. कोहलीने १२२, तर राहुलने १११ धावांची नाबाद खेळी साकारली.
पावसामुळे आजच्या राखीव दिवशी खेळाला सुरुवात झाली तेव्हा पाकिस्तानचे गोलंदाज भन्नाट मारा करत होते. त्यामुळे आता भारताच्या धावा कशा होणार, हा प्रश्न चाहत्यांना पडला होता. पण पावसामुळे खेळपट्टीची मदत पाकिस्तानच्या गोलंदाजांना सुरुवातीला मिळाली. त्यामुळे त्यांचे चेंडू चांगले स्विंग होत होते. राहुल आणि विराटसाठी हा कठीण काळ होता. पण हा कठीण काळ या दोघांनी संयमीपणे खेळून काढला. पण एकदा सेट झाल्यावर मात्र या दोघांनी पाकिस्तानच्या गोलंदाजीचा चांगलाच समाचार घेतला. राहुल हा कोहलीपेक्षा सुरुवातीला जास्त आक्रमक दिसत होता. त्यामुळे त्याचे अर्धशतक पहिले झाले. पण कोहली सुरुवातीला शांत वाटत असला तरी सेट झाल्यावर मात्र त्याने एकामागून एक फटक्यांची माळ लावली. त्यामुळे कोहलीने कधी अर्धशतक झळकावले ते समजलेच नाही. अर्धशतकानंतर या दोघांनी शतकाच्या दिशेने कूच केली.
राहुलने यावेळी फटकेबाजी करत आपल्या वनडे क्रिकटमधील २००० धावा पूर्ण केल्या. दुसरीकडे कोहलीला यावेळी १३ हजार धावांचा टप्पा गाठण्यासाठी ९० धावांची गरज होती. त्यामुळे कोहली या सामन्यात १३ हजार धावा पूर्ण करणार की नाही, याची उत्सुकता सर्वांना लागेलली होती. अर्धशतकानंतर कोहली हा राहुलपेक्षा जास्त आक्रमक फलंदाजी करत होता. त्यामुळे तो राहुलच्या आधी शतक झळकावेल, असे दिसत होते.
आशिया चषक: भारत व पाकिस्तान यांचा आज सामना
भारतासाठी शाहीन आफ्रिदी हा सर्वात घातक गोलंदाज असल्याचे म्हटले जात होते. पण या सामन्यात राहुल आणि विराट या दोघांनी त्याची चांगलीच धुलाई केली. दुसरीकडे हारिस रौफ या सामन्यात दुखापतीमुळे संघाबाहेर होता आणि त्याचा चांगलाच फटका यावेळी पाकिस्तानला बसल्याचे पाहायला मिळाले.