मुंबई । झुंजार न्यूज
राज्यात उद्भवलेली दुष्काळसदृश परिस्थिती आणि दुधाच्या दरात होत असलेली कमालीची घट लक्षात घेऊन दूधगंगाचे संचालक राजवर्धन पाटील यांनी दुग्धविकासमंत्री राधाकृष्ण विखे पाटील यांची मुंबईत भेट घेतली.
या भेटीत दूध दरवाढीचीदेखील चर्चा झाली. दूध दरात 7 रुपयांची वाढ होणार असल्याची माहिती समोर येत आहे. दूधगंगा दूध उत्पादक संघाच्या माध्यमातून इंदापूर तालुक्यात प्रतिदिन 1 लाख लिटर दुधाचे संकलन करण्यात येते
प्रत्यक्ष-अप्रत्यक्ष हजारो युवकांना रोजगार व व्यावसायिक हातभार लावण्यात व दूध व्यवसायाला चालना देण्यात दुधगंगा महत्त्वाची भूमिका बजावत आहे, यामुळेच दूध दरवाढीसंदर्भात राजवर्धन पाटील यांनी दुग्धविकासमंत्री राधाकृष्ण विखे पाटलांची भेट घेऊन सकारात्मक चर्चा केली.
सदर भेटीत झालेल्या चर्चेनुसार दूध दरवाढीच्या प्रश्नांवर दुग्धविकास मंत्री राधाकृष्ण विखे पाटलांनी मंत्रिमंडळ बैठकीत चर्चा करून दूध दरात प्रतिलिटर 7 रुपयांच्या वाढीबाबत निर्णय घेण्याबाबतची सकारात्मकता दर्शवली असल्याची माहिती दूधगंगेचे संचालक राजवर्धन पाटील यांनी दिली.