पानोडी । झुंजार न्यूज

अनेक दशकाच्या प्रतिक्षेनंतर अखेर निळवंडे धरणाच्या उजव्या कॅनॉल द्वारे सोडलेल्या पाण्यामुळे या पट्ट्यामधील गावां – गावांमध्ये आनंदाचे वातावरण निर्माण होवून जलपूजन करत गुलाल उधळून फटाके वाजवत आनंदोत्सव साजरा होताना दिसत आहे. तर वयोवृद्धांच्या डोळ्यातून आनंद अश्रू वाहताना दिसले .

मागील काही दिवसापूर्वी डाव्या कालव्याला पाणी सोडण्यात आले होते, त्यावेळीही गावोगावी जलपूजन करण्यात आले. आणि आताही जलपूजन सुरू आहे, या प्रसंगाची आठवण पिढ्यानपिढ्या राहावी असे हे ऐतिहासिक क्षण आहेत. ज्या भागात पाणी येते त्या भागात संपन्नता आणि आनंद निर्माण होताना दिसत आहे . यातूनचं सहाजिकच समृद्धी येते. अनेक पिढ्यांपासून निळवंडे धरणाच्या पाण्याची लोक वाट पाहत होते मात्र आता हे पाणी या भागात आल्यामुळे सर्वत्र जल्लोषाचे वातावरण निर्माण झाले आहे, शेतकऱ्यांच्या जीवनात आता नवी पहाट उगवली आहे. निळवंडे धरणाची पूर्ती व कालव्यातून पाणी देणे हे आयुष्याचे ध्येय होते ते आता पूर्णत्वास जात असल्याचे समाधान वयोवृद्ध व्यक्त करत आहे.

लोकांच्या आनंदोत्सव बघून माजी मंत्री आ बाळासाहेब थोरात यांना ही पाणी बघण्याचा मोह आवरला नाही त्यांनी पानोडीच्या उजव्या कालव्यावर थांबून कार्यकर्त्यासह फोटो काढले तर आ थोरात यांच्या हस्ते आज मंगळवार खळी , पिंप्री , पानोडी , अंभोरे येथे जलपूजन होणार आहे