आश्वी बुद्रुक या भूमीतून नेहमीच समाजाला दिशा देणारे, समाज प्रबोधनासाठी अखंडपणे कार्यरत असलेले ह.भ.प. सिताराम कोळपे महाराज यांचे एक वर्षापूर्वी अल्पशा आजाराने अकाली निधन झाले. त्यांच्या निधनाने परिसरात एक मोठी पोकळी निर्माण झाली होती. त्यांच्या प्रथम वर्षश्राद्धाच्या निमित्ताने केवळ श्रद्धांजली वाहण्याऐवजी, त्यांच्या मित्रांनी दाखवलेला मैत्रीचा अनोखा आदर्श आज समाजासाठी प्रेरणादायी ठरला आहे.
मैत्रीची खरी व्याख्या कृतीतून सिद्ध
सन १९८९ मध्ये रयत शिक्षण संस्थेच्या न्यू इंग्लिश स्कूल, आश्वी बु. येथून दहावी पूर्ण केलेल्या कोळपे महाराजांच्या बॅचमधील सर्व मित्रांनी आज पुन्हा एकदा एकत्र येऊन ‘मैत्री म्हणजे काय’ याचा जिवंत आदर्श घालून दिला. त्यांनी केवळ जुन्या आठवणींना उजाळा दिला नाही, तर त्यांच्या मित्राच्या कुटुंबाला संकटकाळात आधार दिला. या सर्व मित्रांनी एकत्रितपणे ५०,००० रुपयांची रक्कम जमा केली आणि ती कोळपे महाराजांच्या मुलांच्या शिक्षणासाठी चेकच्या स्वरूपात त्यांच्या परिवाराला सुपूर्द केली.
’एकाचा परिवार म्हणजे सर्वांचा परिवार’
आजच्या धकाधकीच्या आणि भौतिकवादी युगात, जिथे नातेसंबंध फक्त औपचारिकतेपुरते मर्यादित होत चालले आहेत, तिथे या मित्रांनी दाखवलेली एकजूट खरोखरच कौतुकास्पद आहे. संजय शेळके, गंगाधर उंबरकर, बबन म्हसे, राम वाकचौरे,ठकसेन मदने,अजित निपुंगे,विजय उंबरकर, नामदेव थोरात, अशोक ताजणे,राजू कुदनर, गंगा काकडेनाना खरातविलास इलगसुभाष ब्राम्हणेविलास आंधळेशाम गायकवाडसुनिल चतुरेहारुण शेखअनिल बोडखेसौ. काकडेसौ.खरातसौ. म्हसे आणि इतर सर्व मित्रांनी ‘एकाचा परिवार म्हणजे सर्वांचा परिवार’ ही भावना प्रत्यक्ष कृतीतून साकारली. त्यांनी वर्षश्राद्धाचा दिवस केवळ दुःख आणि आठवणींमध्ये न घालवता, तो एका सामाजिक कार्यात रूपांतरित केला.
संकटसमयी दिलासा देणारा मैत्रीचा वारसा ही केवळ आर्थिक मदत नसून, समाजातील सहकार्य, एकजूट आणि माणुसकी या मूल्यांचे एक जिवंत उदाहरण आहे. सिताराम महाराजांचे समाजप्रबोधनाचे कार्य, त्यांचे आदर्श आणि त्यांचे विचार पुढे चालू ठेवण्यासाठी त्यांच्या मुलींना शिक्षणाची भक्कम साथ देणे हीच खरी श्रद्धांजली असल्याचे या मित्रांनी सांगितले. ‘मैत्री म्हणजे संकटसमयी खांद्याला खांदा लावून उभे राहणे’ याचे दर्शन घडवून या मित्रांनी त्यांच्यातील खरी नाळ जपली आहे.
सिताराम महाराजांसारख्या महान समाजसेवकाप्रती कृतज्ञता व्यक्त करण्याचा यापेक्षा चांगला मार्ग असूच शकत नाही. त्यांनी सिद्ध केले की, ‘मैत्रीचा खरा वारसा म्हणजे संकटसमयी दिलासा.’ ही घटना समाजाला एक महत्त्वाचा संदेश देते की, खरी मैत्री ही संकटाच्या काळातच दिसून येते.
