यावेळी आयोजित सभेत आणि रॅली दरम्यान नागरिकांशी संवाद साधताना रामदास आठवले यांनी विनोद जाधव यांना मोठ्या बहुमताने निवडून देण्याचे आवाहन केले. आठवले म्हणाले की, “विनोद जाधव हे केवळ राजकारणी नसून ते तळागाळातील जनतेच्या प्रश्नांसाठी सातत्याने रस्त्यावर उतरून लढणारे एक तरुण आणि तडफदार नेतृत्व आहे. प्रभागाचा रखडलेला विकास आणि सर्वसामान्यांच्या समस्या मार्गी लावण्यासाठी त्यांच्यासारखा अभ्यासू उमेदवार महापालिकेत जाणे काळाची गरज आहे.” यावेळी त्यांनी ‘कप-बशी’ या निवडणूक चिन्हाचा प्रचार करत नागरिकांना भरघोस मतदान करण्याचे आवाहन केले.

या प्रचार रॅलीत रिपब्लिकन पक्षाचे अनेक वरिष्ठ नेते सहभागी झाले होते. यामध्ये महाराष्ट्र प्रदेश सरचिटणीस गौतमभाऊ सोनवणे, पालघर-ठाणे प्रभारी प्रमुख नेते सुरेश बारशिंगे, जिल्हाध्यक्ष अजित रणदिवे, राष्ट्रीय नेत्या शीलाताई अनिल गांगुर्डे, विद्यार्थी संघटनेचे नेते चंद्रशेखरजी कांबळे, देवेंद्र रणपिसे यांच्यासह पक्षाचे अनेक जिल्हा व तालुका स्तरावरील पदाधिकारी उपस्थित होते.

रॅलीमध्ये कार्यकर्त्यांचा उत्साह शिगेला पोहोचला होता. निळ्या निशाणांच्या जयघोषात आणि ‘आठवले साहेब पुढे चला, आम्ही तुमच्या सोबत आहोत’ अशा घोषणांनी परिसर दणाणून गेला होता. ठिकठिकाणी स्थानिकांनी विनोद जाधव आणि रामदास आठवले यांचे स्वागत केले.