अकोले तालुक्यातील कुंभेफळ परिसरात एका साडेतीन वर्षांच्या चिमुकल्याला जबड्यात पकडून पळवून नेणाऱ्या त्या बलाढ्य नर बिबट्याला जेरबंद करण्यात वनविभागाला यश आले आहे. गेल्या चार दिवसांपासून वनविभागाला हुलकावणी देणारा हा बिबट्या अखेर मंगळवारी सायंकाळी पिंजऱ्यात अडकला. मात्र, ही दिलासादायक बातमी ताजी असतानाच, तालुक्यातील हनुमंतगाव परिसरात एका शेतकऱ्यावर बिबट्याने हल्ला केल्याची दुसरी थरारक घटना घडली आहे. यामुळे तालुक्यात बिबट्याच्या दहशतीचे सावट अधिक गडद झाले आहे.
कुंभेफळचा थरार: आजोबांच्या धाडसामुळे नातवाचे प्राण वाचले शुक्रवारी (दि. २१) सायंकाळी कुंभेफळ-तांभोळ रस्त्यावरील कोटकर वस्तीवर काळीज थरकाप उडवणारी घटना घडली होती. अशोक कोटकर यांचा साडेतीन वर्षांचा नातू अंकुर हा अंगणात खेळत असताना उसाच्या शेतात दबा धरून बसलेल्या बिबट्याने त्याच्यावर झडप घातली. बिबट्याने अंकुरला जबड्यात पकडून उसाच्या शेतात ओढून नेले. नातवाला डोळ्यादेखत मृत्यूच्या दाढेत जाताना पाहून आजोबा अशोक कोटकर यांनी जिवाची पर्वा न करता बिबट्याचा पाठलाग केला. सुमारे १५० फूट आत गेल्यावर त्यांनी केलेल्या मोठ्या आरडाओरड्यामुळे बिबट्या बिथरला आणि त्याने अंकुरला सोडून पळ काढला. या हल्ल्यात गंभीर जखमी झालेल्या अंकुरवर सध्या संगमनेर येथील खासगी रुग्णालयात उपचार सुरू असून त्याची प्रकृती आता स्थिर आहे.
ड्रोनद्वारे शोधमोहीम आणि बिबट्या जेरबंद
या घटनेनंतर परिसरात घबराट पसरली होती. वनविभागाने तात्काळ पाच पिंजरे लावले, मात्र बिबट्या सातत्याने हुलकावणी देत होता. अखेर वनविभागाने ड्रोन कॅमेऱ्याची मदत घेत बिबट्याच्या हालचालींवर लक्ष ठेवले. मंगळवारी सायंकाळी हा नर बिबट्या पिंजऱ्यात अडकला आणि ग्रामस्थांनी सुटकेचा नि:श्वास सोडला. सहाय्यक उपवनसंरक्षक अमरजीत पवार, वनपरिक्षेत्र अधिकारी ए. सी. पाटील यांच्या मार्गदर्शनाखाली वनपाल डी. व्ही. जाधव व त्यांच्या पथकाने ही मोहीम यशस्वी केली.
हनुमंतगावात पुन्हा रक्ताचा सडा: शेतकऱ्यावर हल्ला
एक बिबट्या पकडला गेल्याचा आनंद साजरा होत असतानाच, हनुमंतगाव परिसरातील सोनगाव शिवारात दुसरी घटना घडली. मच्छिंद्र भाऊसाहेब जेजुरकर हे आपल्या शेतात कपाशीवर औषध फवारणी करत असताना उसातून आलेल्या बिबट्याने त्यांच्यावर अचानक झडप घातली. जेजुरकर यांनी आरडाओरड केल्याने शेजारील शेतकरी नाना जेजुरकर आणि संदीप दिघे धावून आले, ज्यामुळे बिबट्याने तिथून पळ काढला. जेजुरकर हे या हल्ल्यातून थोडक्यात बचावले आहेत.
वनविभागाच्या कार्यपद्धतीवर ग्रामस्थांचा रोष
हनुमंतगाव परिसरात बिबट्याची मादी आणि पिल्ले असल्याबाबत ग्रामस्थांनी वनविभागाला वारंवार कळवले होते. मात्र, ठोस उपाययोजना न केल्यामुळेच हा हल्ला झाल्याचा आरोप नागरिकांनी केला आहे. बिबट्याच्या भीतीने मजूर शेतात कामाला येण्यास तयार नाहीत, परिणामी शेतीची कामे ठप्प झाली आहेत. जर तातडीने पिंजरा लावून या बिबट्याचा बंदोबस्त केला नाही, तर तीव्र आंदोलन करण्याचा इशारा ग्रामस्थांनी दिला आहे .
अकोले तालुक्यात एकीकडे वनविभागाच्या मोहिमेला यश आले असले, तरी दुसरीकडे बिबट्यांचे वाढते हल्ले ही चिंतेची बाब बनली आहे. आता वनविभाग हनुमंतगाव परिसरातील त्या दुसऱ्या बिबट्याला कधी जेरबंद करणार, याकडे सर्वांचे लक्ष लागले आहे.
