डॉ.जयश्रीताई थोरात यांच्या पुढाकारातून 7 मार्च ते 12 मार्च 2026 या काळात रंगणार भव्य स्पर्धा

संगमनेर । झुंझार न्यूज

काँग्रेसच्या राष्ट्रीय वर्किंग कमिटीचे सदस्य तथा महाराष्ट्राचे वरिष्ठ नेते बाळासाहेब थोरात यांच्या मार्गदर्शनाखाली तालुक्यातील महिला व युवतींच्या सबलीकरणाकरता एकविरा फाउंडेशन च्या माध्यमातून विविध उपक्रमांचे आयोजन केले जात आहे. येत्या 8 मार्च आंतरराष्ट्रीय महिला दिनाच्या निमित्ताने संगमनेर शहरात 7 मार्च ते 12 मार्च या कालावधीमध्ये भव्य महिला टेनिस बॉल क्रिकेट स्पर्धा, रस्सीखेच व बॅडमिंटन स्पर्धा आयोजित करण्यात आले असल्याची माहिती एकविराच्या संस्थापक अध्यक्षा कॅन्सरतज्ञ डॉ.जयश्रीताई थोरात यांनी दिली आहे.

सहकारमहर्षी भाऊसाहेब थोरात क्रीडा संकुल येथे जागतिक महिला दिनाच्या निमित्ताने एकविरा फाउंडेशनच्या वतीने दरवर्षी महिला स्पर्धांचे आयोजन होत असते. मागील 4 वर्षापासून होणाऱ्या या स्पर्धांमध्ये शहर व तालुक्यातील आणि बाहेरील शेकडो महिलांनी अत्यंत उत्साहाने सहभाग घेतला. शालेय विद्यार्थिनी ते 65 वर्षांच्या आजींचा सहभाग असलेल्या या स्पर्धा राज्यस्तरावर लौकिकास्पद ठरल्या आहे. देशात महिला क्रिकेट अत्यंत लोकप्रिय ठरत असून भारतीय महिला क्रिकेट संघाने विश्वचषक जिंकून महिला क्रिकेटला अधिक बळकटी दिली आहे. यामुळे ग्रामीण भागातील मुलींमध्ये ही महिला क्रिकेटची प्रचंड लोकप्रियता झाली आहे.

यावर्षी 7 मार्च ते 12 मार्च 2026 या काळात सहकारमहर्षी भाऊसाहेब थोरात क्रीडा संकुलात भव्य टेनिस बॉल क्रिकेट स्पर्धा, रस्सीखेच स्पर्धा व बॅडमिंटन स्पर्धा होणार आहे. या स्पर्धेसाठी लहान गट इयत्ता पहिली ते दहावी, मध्यम गट अकरावी ते पदवी आणि खुला गट महिला असे तीन गट करण्यात आले आहेत.

तिन्ही गटातील क्रिकेट व रस्सीखेच स्पर्धेसाठी पहिले बक्षीस 11100 रुपये व ट्रॉफी, द्वितीय बक्षीस 7000 रुपये व ट्रॉफी आणि तृतीय बक्षीस 5000 रुपये व ट्रॉफी असे देण्यात येणार आहे. तर बॅडमिंटन स्पर्धेसाठी प्रथम द्वितीय व तृतीय असे रोख व सन्मानचिन्हसह वैयक्तिक बक्षिसे दिले जाणार आहेत.

या स्पर्धेचे उद्घाटन 7 मार्च 2026 रोजी महाराष्ट्राचे मा.महसूल मंत्री बाळासाहेब थोरात, मा.आ.डॉ.सुधीर तांबे, आमदार सत्यजित तांबे,सौ.कांचनताई थोरात,सौ.दुर्गाताई तांबे,नगराध्यक्ष डॉ. मैथिलीताई तांबे, आयोजक डॉ.जयश्रीताई थोरात यांसह संगमनेर शहरातील विविध मान्यवर महिलांच्या उपस्थितीत होणार आहे.

एकविरा फाउंडेशन च्या वतीने या स्पर्धेची जय्यत तयारी करण्यात येत असून सहभागी होण्यासाठी महिला व युवतींनी यशोधन कार्यालय व 7057037037 या क्रमांकावर संपर्क साधावा असे आवाहन करण्यात आले आहे.