आश्वी । झुंझार न्यूज

“चला सायकल चालवूया, आरोग्य जपूया आणि पर्यावरणाचे रक्षण करूया” हा उदात्त सामाजिक संदेश घेऊन नाशिक येथील ‘रॉयल राईड्स नाशिक सायकलिंग क्लब’च्या वतीने आयोजित करण्यात आलेल्या ‘नाशिक ते पंढरपूर‘ सायकल वारीचे यंदा सहावे वर्ष मोठ्या उत्साहात साजरे होत आहे. शुक्रवारी (दि. १२ जुलै) पहाटे ५ वाजता नाशिकहून प्रस्थान झालेली ही वारी सकाळी ११ वाजता लोणी येथे दाखल झाली असता, ग्रामस्थांच्या वतीने त्यांचे उत्स्फूर्त स्वागत करण्यात आले.

या सायकल वारीचे वैशिष्ट्य म्हणजे यामध्ये केवळ तरुणच नव्हे, तर ३० महिला सायकलस्वार आणि वयोवृद्ध नागरिकांचाही मोठ्या प्रमाणावर सहभाग आहे. एकूण ३३७ सायकलस्वार विठू माऊलीच्या ओढीने आणि आरोग्याचा जागर करत पंढरपूरकडे निघाले आहेत. सायकलच्या घंटीचा आवाज आणि ‘विठ्ठल-विठ्ठल’चा जयघोष करत या वारकऱ्यांनी लोणी परिसर भक्तीमय करून टाकला.

दरवर्षाप्रमाणे यंदाही या सायकलिंग वारकऱ्यांचे लोणी येथे आगमन झाले. लोणी पोलीस स्टेशनच्या प्रांगणात सामाजिक कार्यकर्ते दीपक धावणे यांच्या वतीने सर्व सायकलस्वारांसाठी न्याहारीची (अल्पोपहार) उत्तम सोय करण्यात आली होती. यावेळी लोणी पोलीस स्टेशनचे पोलीस निरीक्षक युवराज आठरे यांनी सर्व सायकलस्वार वारकऱ्यांचे शब्दसुमनांनी स्वागत केले आणि त्यांना पुढील प्रवासासाठी शुभेच्छा दिल्या.

याप्रसंगी बोलताना क्लबचे प्रमुख डॉ. आबा पाटील म्हणाले की, “आजच्या धावपळीच्या आणि धकाधकीच्या जीवनात स्वतःला निरोगी ठेवणे हे मोठे आव्हान आहे. वर्षातून एकदा अशा प्रकारे सायकल वारी केल्याने शारीरिक आरोग्यासोबतच मानसिक शांती मिळते. या उपक्रमातून धार्मिक श्रद्धा जपली जातेच, पण त्यासोबतच प्रदूषणमुक्त पर्यावरणाचा संदेशही समाजात पोहोचवला जातो.”

पोलीस निरीक्षक युवराज आठरे यांनी या उपक्रमाचे कौतुक करताना सांगितले की, “सायकल वारीच्या माध्यमातून समाजप्रबोधन, आरोग्य आणि धार्मिकतेची एक सुरेख गुंफण घातली जात आहे, ही काळाची गरज आहे.

ही सायकल वारी तीन टप्प्यांत पूर्ण होणार आहे:

१. पहिला दिवस: नाशिकहून निघून लोणी, राहुरी, शिंगवे, देहरेमार्गे प्रवास करत अहिल्यानगर (अहमदनगर) येथे मुक्काम.
२. दुसरा दिवस: अहिल्यानगर ते टेंभुर्णी असा प्रवास व तिथे मुक्काम.
३. तिसरा दिवस: टेंभुर्णी ते पंढरपूर विठ्ठल मंदिर असा अंतिम टप्पा गाठून ही वारी विठ्ठलाच्या चरणी विलीन होईल.

या सोहळ्याप्रसंगी डॉ. आबा पाटील यांच्या हस्ते पोलीस निरीक्षक युवराज आठरे आणि सामाजिक कार्यकर्ते दीपक धावणे यांचा ‘विठू माऊलीची’ प्रतिमा असलेली ट्रॉफी देऊन विशेष सत्कार करण्यात आला.

याप्रसंगी नंदू शेठ राठी, रामनाथ आहेर, बंडू लगड, महेंद्र शेठ, कृष्णा कुल्हे, गौरव पुलाटे यांच्यासह मोठ्या संख्येने सायकलस्वार, स्थानिक कार्यकर्ते आणि पोलीस कर्मचारी उपस्थित होते. विठ्ठलाच्या गजरात आणि सायकलच्या चैतन्यमयी वातावरणात हा स्वागत सोहळा पार पडला.