“पोलीस ठाण्याची पायरी चढताना मनात भीती नको, हक्क हवा!” आणि “गावातील वाद गावातच मिटवा…” असा थेट, ग्रामीण ढंगातील संवाद साधत तत्कालीन गृहमंत्री स्व. आर. आर. पाटील (आबा) यांनी १३ मार्च २०१४ रोजी आश्वी पोलीस ठाण्याच्या उद्घाटनप्रसंगी आश्वीकरांशी संवाद साधला होता. त्यांच्या याच शब्दांची आठवण करून देणारे फलक आश्वी बु॥ येथील बाजारतळ तसेच अम्रेश्वर महादेव मंदिर परिसरात काही जागरूक तरुणांनी रात्री लावले आहेत. हे फलक सध्या सोशल मीडियावर मोठ्या प्रमाणात व्हायरल होत असून, बारा वर्षांनंतर आबांच्या त्या संदेशाची पुन्हा चर्चा सुरू झाली आहे.
आबांनी उद्घाटनावेळी मोठ्या संख्येने उपस्थित असलेल्या नागरिकांकडे पोलिसांवरील विश्वासाचे प्रतीक म्हणून पाहिले होते. अन्याय झाल्यास सर्वसामान्य नागरिकाने कोणतीही भीती न बाळगता पोलिसांकडे हक्काने जावे, गरिबातील गरीब व्यक्तीलाही सन्मानाची वागणूक मिळावी आणि पोलीस व जनता यांच्यात विश्वासाचे नाते निर्माण व्हावे, अशी अपेक्षा त्यांनी व्यक्त केली होती. अवैध धंदे, गुंडगिरी आणि महिलांच्या सुरक्षिततेच्या प्रश्नांवरही त्यांनी भाष्य केले होते. त्याचबरोबर पोलीस प्रशासनासोबत नागरिकांनीही सहकार्य करणे आवश्यक असल्याचे त्यांनी स्पष्ट केले होते.
आज पुन्हा का चर्चेत आला आबांचा संदेश?
आबांच्या भाषणाची आठवण करून देणारे हे फलक अशा वेळी समोर आले आहेत, जेव्हा आश्वी पोलीस ठाण्याच्या कार्यक्षेत्रातील कथित अवैध धंदे, नागरिकांच्या तक्रारी आणि गणेशोत्सवातील मिरवणुकीदरम्यान पोलिसांच्या वर्तनाबाबत विविध प्रश्न उपस्थित होत आहेत. त्यामुळे हा फलक केवळ जुन्या आठवणी जागवणारा ठरला नसून, आजच्या परिस्थितीशी त्याची सांगड घातली जात आहे.
अवैध धंद्यांबाबत नागरिकांचे सवाल
आश्वी परिसरात विविध प्रकारचे अवैध व्यवसाय सुरू असल्याच्या तक्रारी आणि वृत्ते अलीकडच्या काळात समोर आली आहेत. यापूर्वीही आश्वी परिसरात अवैध दारूविक्रीविरोधात कारवाई झाल्याच्या बातम्या प्रसिद्ध झाल्या आहेत. त्यामुळे नागरिकांकडून एक प्रश्न उपस्थित केला जात आहे—अवैध धंद्यांबाबत तक्रारी होत असतील, तर त्यावर सातत्याने आणि निष्पक्षपणे कारवाई होणे आवश्यक नाही का?
गणेशोत्सवातील पोलिसांच्या भूमिकेवरही चर्चा
यंदाच्या गणेश विसर्जन मिरवणुकीदरम्यान काही गणेश मंडळांनी पोलिसांच्या वर्तनाबाबत आक्षेप घेतल्याचे वृत्त समोर आले. मिरवणुकीत वेळेचे पालन आणि कायदा-सुव्यवस्था राखणे ही पोलिसांची जबाबदारी असली, तरी उत्सव साजरा करणाऱ्या तरुण मंडळांशी संवाद आणि समन्वयातून वातावरण सकारात्मक ठेवणेही महत्त्वाचे आहे.
याच पार्श्वभूमीवर आबांनी २०१४ मध्ये मांडलेल्या ‘विश्वासाच्या पोलिस ठाण्या’च्या संकल्पनेची पुन्हा आठवण होत आहे.
‘पोलीस ठाणे भीतीचे की विश्वासाचे?’
अवैध धंद्यांबाबतच्या तक्रारी असोत, उत्सवातील तरुण मंडळांचे प्रश्न असोत किंवा सामान्य नागरिकांच्या सुरक्षिततेचा विषय असो—पोलीस आणि नागरिक यांच्यातील संवाद व विश्वास अधिक मजबूत होणे गरजेचे आहे.
आबांनी ज्या पोलीस ठाण्याच्या उद्घाटनावेळी नागरिकांना “पायरी चढताना मनात भीती नको, हक्क हवा” असा संदेश दिला होता, त्याच ठिकाणी आज नागरिकांना तक्रार घेऊन जाताना तितकाच विश्वास वाटतो का, हा प्रश्न सोशल मीडियावरील या फलकामुळे पुन्हा चर्चेत आला आहे.
वरिष्ठ पोलिस प्रशासनाकडून अपेक्षा
आश्वी परिसरातील अवैध धंद्यांबाबतच्या तक्रारी, गणेशोत्सवातील मंडळांचे आक्षेप आणि पोलिसांच्या कार्यपद्धतीबाबत सुरू झालेली चर्चा याची वरिष्ठ पोलिस अधिकाऱ्यांनी वस्तुनिष्ठ दखल घ्यावी, अशी अपेक्षा नागरिकांकडून व्यक्त होत आहे.
आबांच्या शब्दांतील ‘विश्वास’ आणि आज नागरिकांच्या मनातील ‘प्रश्न’ यांच्यातील अंतर कमी करण्यासाठी पोलीस प्रशासनाने पारदर्शकपणे संवाद साधण्याची गरज व्यक्त होत आहे.
आबांनी २०१४ मध्ये दाखवलेला ‘विश्वासाचा पोलीस ठाणा’ आजच्या आश्वीमध्ये पुन्हा दिसणार का?—हा प्रश्न सध्या आश्वीकरांच्या चर्चेचा केंद्रबिंदू ठरला आहे.
