दुसरीकडे माजी खासदार डॉ. सुजय विखे पाटील यांनीही जिल्हा बँकेसाठी उमेदवारी अर्ज दाखल केल्याने निवडणुकीच्या राजकीय समीकरणांमध्ये आणखी एक महत्त्वाचा घटक समोर आला आहे.

डॉ. सुजय विखे पाटील यांची राजकीय कारकीर्द आणि विखे कुटुंबाचा जिल्ह्यातील सहकार क्षेत्राशी असलेला दीर्घ संबंध यामुळे त्यांच्या उमेदवारीकडे राजकीय वर्तुळाचे लक्ष लागले आहे. त्यांच्या समर्थकांकडून जिल्हा बँकेच्या कारभारात सक्रिय भूमिका घेण्याबाबत चर्चा केली जात आहे.

मात्र, कोणत्या मतदारसंघातून कोणाची उमेदवारी कायम राहणार आणि अंतिमतः संचालक मंडळाचे चित्र कसे असेल, हे उमेदवारी अर्जांच्या छाननीनंतर आणि विशेषतः माघारीनंतरच स्पष्ट होणार आहे.

दोन दादांच्या उमेदवारीमुळे चर्चेला उधाण

सुजय विखे पाटील आणि रणजितसिंह देशमुख या दोघांनीही उमेदवारी अर्ज दाखल केल्याने जिल्हा बँकेच्या राजकारणात ‘दोन दादां’च्या भूमिकेची चर्चा सुरू झाली आहे. मात्र, दोघांची उमेदवारी कोणत्या व्यापक राजकीय आणि सहकाराच्या समीकरणाचा भाग आहे, हे आगामी बैठका आणि उमेदवारी माघारीनंतर अधिक स्पष्ट होण्याची शक्यता आहे.

जिल्हा बँकेच्या सत्ताकारणात अध्यक्ष आणि उपाध्यक्षपदाला विशेष महत्त्व असते. त्यामुळे संचालक मंडळाची रचना कोणत्या पद्धतीने होते, कोणते गट एकत्र येतात आणि नेतृत्वाबाबत कोणता समझोता होतो, यावर आगामी राजकीय समीकरणे अवलंबून राहणार आहेत.

थोरात-विखे-गडाख गटांच्या हालचालींकडे लक्ष

जिल्हा बँकेच्या निवडणुकीच्या पार्श्वभूमीवर बाळासाहेब थोरात, डॉ. सुजय विखे पाटील आणि माजी मंत्री शंकरराव गडाख यांच्या गटांमधील हालचालींकडे सहकार क्षेत्राचे लक्ष लागले आहे.

संगमनेर आणि सोनई येथे झालेल्या बैठका या पार्श्वभूमीवर महत्त्वाच्या मानल्या जात आहेत. विविध गटांना विश्वासात घेऊन निवडणूक बिनविरोध करण्याचा फॉर्म्युला ठरतो का, की प्रत्येक गट आपापल्या ताकदीने निवडणूक लढवतो, याचे चित्र पुढील काही दिवसांत स्पष्ट होणार आहे.

२२ जागांसाठी निवडणूक

अहिल्यानगर जिल्हा मध्यवर्ती सहकारी बँकेच्या संचालक मंडळातील २२ जागांसाठी ही निवडणूक होत आहे. उमेदवारी अर्ज दाखल करण्याची प्रक्रिया २८ सप्टेंबर ते ५ ऑक्टोबर या कालावधीत झाली आहे. ६ ऑक्टोबर रोजी अर्जांची छाननी होणार असून, ७ ते २१ ऑक्टोबरदरम्यान उमेदवारी अर्ज मागे घेता येणार आहेत.

निवडणूक आवश्यक ठरल्यास २ नोव्हेंबर रोजी मतदान होणार असून ३ नोव्हेंबर रोजी मतमोजणी होणार आहे.

आतापर्यंत ८४६ पेक्षा अधिक उमेदवारी अर्जांची विक्री झाल्याची माहिती असून १०९ उमेदवारी अर्ज दाखल झाले आहेत. त्यामुळे इच्छुकांची संख्या मोठी आहे. अशा परिस्थितीत सर्व गटांना सामावून घेऊन निवडणूक बिनविरोध करण्याचे मोठे आव्हान प्रमुख नेत्यांसमोर आहे.

आता खरी परीक्षा माघारीच्या टप्प्यात

उमेदवारी अर्ज दाखल करण्याची प्रक्रिया पूर्ण झाल्यानंतर आता सर्वांचे लक्ष अर्जांच्या छाननीकडे आणि त्यानंतरच्या माघारीच्या प्रक्रियेकडे लागले आहे. कोणते उमेदवार अर्ज कायम ठेवतात, कोण कोणाच्या विनंतीवरून माघार घेतात आणि कोणत्या मतदारसंघात थेट लढत होते, यावरच जिल्हा बँकेच्या निवडणुकीचे अंतिम चित्र स्पष्ट होणार आहे.

मुख्यमंत्री देवेंद्र फडणवीस, उपमुख्यमंत्री एकनाथ शिंदे, राष्ट्रवादी काँग्रेसच्या नेत्या सुनेत्रा अजित पवार, जिल्ह्याचे पालकमंत्री तथा जलसंपदा मंत्री डॉ. राधाकृष्ण विखे पाटील, सभापती राम शिंदे तसेच महायुतीतील विविध नेत्यांची भूमिका या प्रक्रियेत महत्त्वाची ठरण्याची शक्यता आहे.

त्यामुळे सध्या प्रश्न केवळ ‘जिल्हा बँकेच्या चाव्या कोणाच्या हातात?’ एवढाच राहिलेला नाही. तर या चाव्या कोणत्या राजकीय-सहकारी समन्वयातून कोणाच्या हातात जातात, कोणते गट एकत्र येतात आणि २२ जागांचे अंतिम गणित कसे जुळते, याकडे संपूर्ण जिल्ह्याचे लक्ष लागले आहे.

२१ ऑक्टोबरनंतरच जिल्हा बँकेच्या राजकारणाचे खरे चित्र स्पष्ट होणार आहे.