गावागावांत या उपक्रमाचे स्वागत उत्साहात झाले. अनेक ठिकाणी मुलांनी आनंदाने खेळायला सुरुवातही केली. काही ठिकाणी पालकांनी संघटनेचे कौतुक करत म्हटले की, “हा उपक्रम केवळ खेळाचा नाही तर नव्या पिढीला योग्य दिशेने नेणारा आहे. शिवराज्य निर्माण संघटनेचा हा उपक्रम फक्त खेळापुरता मर्यादित नसून, तरुणाईत सकारात्मक ऊर्जा, संघभावना आणि आरोग्यपूर्ण जीवनशैलीचा संदेश देणारा आहे. या प्रयत्नामुळे नक्कीच संगमनेर तालुक्यातील तरुण पुन्हा एकदा मैदानी खेळांकडे वळतील आणि “आरोग्य हेच खरे संपत्ती” या विचाराची पुनर्रचना होईल.

रणजितसिंह देशमुख यांच्या भावना

रणजितसिंह देशमुख म्हणाले, “मी माझा वाढदिवस नेहमीच समाजासाठी काहीतरी अर्थपूर्ण देऊन साजरा करावा, असा माझा प्रयत्न असतो. शिवराज्य निर्माण संघटनेच्या माध्यमातून या वर्षी मुलांना हॉलीबॉल किट वाटपाचा उपक्रम राबवला गेला, हे माझ्यासाठी अतिशय आनंददायी आणि भावनिक क्षण आहेत. आजच्या डिजिटल युगात मुलं मोबाईलच्या पडद्यामागे हरवून चालली आहेत. खेळ, अंगमेहनत, संघभावना या सगळ्या गोष्टी त्यांच्या जीवनातून हळूहळू निघून जात आहेत. पण आज जेव्हा मी मुलांच्या हातात हॉलीबॉल पाहिला, त्यांच्या चेहऱ्यावरचा आनंद आणि खेळाची ओढ पाहिली, तेव्हा मन खरंच भारावून गेलं.”

ते पुढे म्हणाले, “मी बालपणी स्वतः गावच्या मैदानावर मित्रांसोबत खेळलो, घाम गाळला, हरलो-जिंकलो — त्या खेळातूनच जीवनाचे खरे धडे मिळाले. आज तीच संस्कृती पुन्हा आपल्या मुलांमध्ये जागी होत आहे, यापेक्षा मला वाढदिवसाला मोठं गिफ्ट काहीच असू शकत नाही. माझा वाढदिवस फक्त माझा नसतो — तो समाजाचा, तरुणाईचा आणि आपल्या भविष्यातल्या भारताचा असतो. जर या उपक्रमामुळे एखादं मूल मोबाईल बाजूला ठेवून मैदानावर पाऊल ठेवेल, तर तीच माझ्यासाठी खरी भेट, खरी समाधानाची भावना असेल.”