पुणे । झुंझार न्यूज

पुणे महानगरपालिका निवडणुकीत ‘रिपब्लिकन पार्टी ऑफ इंडिया’ (आठवले गट) या पक्षाने आपल्या झेंड्याखाली घवघवीत यश संपादन केले आहे. या निवडणुकीत विजयी झालेल्या पक्षाच्या चारही प्रमुख शिलेदारांनी नुकतीच केंद्रीय सामाजिक न्याय राज्यमंत्री रामदास आठवले यांची सदिच्छा भेट घेतली. या भेटीदरम्यान आठवले यांनी सर्व नवनिर्वाचित प्रतिनिधींचे पुष्पगुच्छ देऊन अभिनंदन केले आणि त्यांना पुढील वाटचालीसाठी शुभेच्छा दिल्या.

यावेळी बोलताना रामदास आठवले भावूक झाले. ते म्हणाले की, “हा विजय केवळ या चार उमेदवारांचा नसून तो अहोरात्र कष्ट करणाऱ्या प्रत्येक भीमसैनिकाचा आणि डॉ. बाबासाहेब आंबेडकरांच्या विचारधारेचा विजय आहे. प्रतिकूल परिस्थितीतही पक्षाचा विचार तळागाळापर्यंत पोहोचवल्यामुळेच आज हे यश मिळाले आहे.”

पुणे महापालिकेत आरपीआयच्या वतीने परशुराम वाडेकर, हिमाली कांबळे, निलेश आल्हाट आणि निशा मानवतकर या चारही उमेदवारांनी मोठ्या मताधिक्याने विजय मिळवला आहे. या चारही नवनिर्वाचित सदस्यांनी रामदास आठवले यांच्या निवासस्थानी जाऊन त्यांचे आशीर्वाद घेतले आणि प्रभागातील कामांचा आढावा सादर केला.

विकासासाठी कंबर कसा; आठवलेंचा कानमंत्र

नवनिर्वाचित प्रतिनिधींना मार्गदर्शन करताना रामदास आठवले यांनी कडक सूचना दिल्या. त्यांनी सांगितले की, “आता विजयाचा जल्लोष संपवून प्रत्यक्ष कामाला लागा. पुणे शहराच्या सर्वांगीण विकासासाठी आणि विशेषतः झोपडपट्टीवासीयांच्या घरांच्या व नागरी सुविधांच्या प्रश्नांसाठी आक्रमकपणे काम करा. सत्तेचा वापर हा केवळ समाजातील शेवटच्या घटकाला न्याय मिळवून देण्यासाठीच झाला पाहिजे, हाच रिपब्लिकन पक्षाचा मुख्य संकल्प आहे.”

या भेटीदरम्यान पक्षाचे पश्चिम महाराष्ट्र अध्यक्ष संजय सोनवणे, शहराध्यक्ष बाळासाहेब जानराव यांच्यासह पुण्यातील अनेक महत्त्वाचे पदाधिकारी उपस्थित होते. आगामी काळात पुणे महापालिकेत रिपब्लिकन पक्षाच्या माध्यमातून सर्वसामान्यांचे प्रश्न कसे मांडले जातील आणि विकासाची नवी दृष्टी कशी राबवली जाईल, यावरही या बैठकीत सविस्तर चर्चा करण्यात आली.

“विकासासाठी कंबर कसा, जनसेवेचा ठेवा वारसा” हा संदेश घेऊन हे चारही शिलेदार आता पुणेकरांच्या सेवेसाठी सज्ज झाले आहेत. या विजयामुळे पुणे शहरात आरपीआयच्या कार्यकर्त्यांमध्ये उत्साहाचे वातावरण संचारले आहे.