संगमनेर । झुंझार न्यूज

संगमनेर तालुक्यातील पिंप्री लौकी अजमपुर येथील ज्येष्ठ आणि आदरणीय व्यक्तिमत्व परमपूज्य किसनराव कारभारी गिते (पाटील) यांचे आज, रविवार दिनांक २२ फेब्रुवारी २०२६ रोजी सायंकाळी ७ वाजता वृद्धापकाळाने निधन झाले. मृत्यूसमयी त्यांचे वय वृद्धत्वाकडे झुकलेले होते. त्यांच्या निधनामुळे पिंप्री लौकी परिसरासह संगमनेर तालुक्यात शोककळा पसरली आहे.

किसनराव गिते हे अत्यंत साध्या आणि मनमिळावू स्वभावाचे व्यक्तिमत्व म्हणून परिचित होते. त्यांनी आपल्या जीवनात सामाजिक मूल्यांची जोपासना केली. ते पिंप्री लौकी अजमपुर येथील सामाजिक कार्यकर्ते भारतराव पाटील गिते आणि भाऊसाहेब गिते यांचे वडील होत. तसेच पिंप्री गावच्या विद्यमान सरपंच सौ. संगिता गिते आणि उद्योजिका ज्योती गिते यांचे ते सासरे होते.

गिते परिवाराचा सामाजिक आणि राजकीय क्षेत्रात मोठा वावर असून, किसनराव गिते यांच्या मार्गदर्शनाखाली परिवाराने गावात विविध विकासकामे आणि सामाजिक उपक्रम राबवले आहेत. त्यांच्या निधनाने एका मार्गदर्शक आणि कुटुंबप्रमुखाला मुकल्याची भावना व्यक्त होत आहे.

त्यांच्या पार्थिवावर उद्या सोमवार, दिनांक २३ फेब्रुवारी २०२६ रोजी सकाळी ९ वाजता पिंप्री लौकी अजमपुर येथील ‘ब्राम्हण ओढा’ येथे अंत्यसंस्कार करण्यात येणार आहेत.

त्यांच्या निधनाबद्दल जनसेवा मंडळ पिंप्री लौकी, ग्रामपंचायत प्रशासन तसेच समस्त ग्रामस्थांनी दुःख व्यक्त केले असून त्यांना भावपूर्ण श्रद्धांजली अर्पण केली आहे.