दाढ बुद्रुक येथे नवनाथ कथा सोहळ्याचा उत्साह

शालिनीताईंनी लुटला फुगडीचा आनंद

झरेकाठी । झुंझार न्यूज

“आजच्या धकाधकीच्या आणि धावपळीच्या जीवनात मनाला शांती मिळवण्यासाठी अध्यात्माची नितांत गरज आहे. गावोगावी आयोजित केले जाणारे सप्ताह आणि कथासोहळे हे केवळ धार्मिक परंपरा नसून, ती माणसांची मने जोडण्याचे आणि सामाजिक एकोपा वाढविण्याचे प्रभावी माध्यम आहे. मात्र, अध्यात्म जपताना भाविकांनी अंधश्रद्धेला थारा न देता ‘डोळस श्रद्धेला’ महत्त्व द्यावे,” असे प्रतिपादन जिल्हा परिषदेच्या माजी अध्यक्षा सौ. शालिनीताई विखे पाटील यांनी केले.

राहाता तालुक्यातील दाढ बुद्रुक येथे हनुमंतरायांच्या अखंड हरिनाम सप्ताहानिमित्त भामाठाण येथील अडबंगनाथ देवस्थानचे मठाधिपती महंत अरुणगिरीजी महाराज यांच्या संगीतमय नवनाथ कथा सोहळ्याचे आयोजन करण्यात आले आहे. या सोहळ्याला भेट देऊन भाविकांशी संवाद साधताना त्या बोलत होत्या. याप्रसंगी कथेच्या भक्तीमय वातावरणात सौ. शालिनीताई यांनी महिलांसोबत फुगडीचा आनंद लुटला, ज्यामुळे उपस्थितांमध्ये उत्साहाचे वातावरण निर्माण झाले होते.

विखे पाटील परिवाराचे अध्यात्माला पाठबळ

सौ. विखे पाटील पुढे म्हणाल्या की, “विखे पाटील परिवाराने नेहमीच वारकरी संप्रदाय आणि संतपरंपरा जपण्याच्या कार्याला प्राधान्य दिले आहे. समाजाच्या सर्वांगीण विकासासाठी अध्यात्मिक अधिष्ठान असणे आवश्यक आहे. महिलांनी विशेषतः कोणत्याही भोंदूगिरीला किंवा अंधश्रद्धेला बळी न पडता विवेकाने अध्यात्माचा स्वीकार करावा.”

विकास आणि अध्यात्माची सांगड : महंत अरुणगिरीजी महाराज

यावेळी कथाकार महंत अरुणगिरीजी महाराज यांनी विखे पाटील परिवाराच्या कार्याचे कौतुक केले. ते म्हणाले की, “नामदार राधाकृष्ण विखे पाटील यांच्या माध्यमातून शिर्डी विधानसभा मतदारसंघात अध्यात्मिक चळवळीला मोठी चालना मिळत आहे. तीर्थक्षेत्रांच्या विकासासोबतच जनसामान्यांचे प्रश्न मार्गी लावले जात आहेत. भामाठाणच्या विकासासाठीही या परिवाराने नेहमीच मदतीचा हात दिला आहे.” दाढ बुद्रुक येथील हा सोहळा अत्यंत भव्य असून ग्रामस्थांचा सहभाग कौतुकास्पद असल्याचेही त्यांनी नमूद केले.

सुजय विखे पाटील यांच्याकडून तातडीची मदत
पद्मश्री विखे पाटील कारखान्याचे संचालक गोरक्षनाथ तांबे यांनी यावेळी आपले मनोगत व्यक्त करताना लोकनेते बाळासाहेब विखे पाटील यांच्या ‘सर्वधर्म समभावाच्या’ शिकवणीची आठवण करून दिली. ते म्हणाले की, “कथेच्या प्रांगणात पावसामुळे चिखल झाला होता, ज्यामुळे भाविकांची गैरसोय होत होती. ही बाब भाजप प्रदेश उपाध्यक्ष डॉ. सुजय विखे पाटील यांच्या निदर्शनास आणून देताच, त्यांनी तातडीने पेव्हिंग ब्लॉक उपलब्ध करून दिले.” याबद्दल ग्रामस्थांच्या वतीने त्यांचे विशेष आभार मानण्यात आले.

मंगळवारी काल्याचे कीर्तन आणि महाप्रसाद

दाढ बुद्रुक येथील या नवनाथ कथा सोहळ्याची सांगता मंगळवार, २५ ऑगस्ट रोजी महंत अरुणगिरीजी महाराज यांच्या काल्याच्या कीर्तनाने होणार आहे. त्यानंतर महाप्रसादाचे वाटप केले जाईल. या सांगता सोहळ्यास आणि महाप्रसादाचा लाभ घेण्यासाठी पंचक्रोशीतील भाविकांनी मोठ्या संख्येने उपस्थित राहावे, असे आवाहन दाढ बुद्रुक ग्रामस्थांच्या वतीने करण्यात आले आहे.

याप्रसंगी विविध संस्थांचे पदाधिकारी, ग्रामस्थ, महिला आणि भाविक मोठ्या संख्येने उपस्थित होते.