पुरवठा विभागाने ही तपासणी प्रक्रिया अत्यंत नियोजनबद्ध पद्धतीने तीन टप्प्यांत राबवण्याचे ठरवले आहे:

• पहिला टप्पा: मृत झालेले लाभार्थी किंवा कायमस्वरूपी स्थलांतरित झालेल्या नागरिकांची नावे रेशनकार्डमधून वगळण्यात आली आहेत.

• दुसरा टप्पा: पात्रतेत न बसणाऱ्या कार्डांचे वर्गीकरण ‘एनपीएच’ (केशरी) गटात करण्यात आले असून, त्यांचा धान्यपुरवठा थांबवण्यात आला आहे.

• तिसरा टप्पा: ज्या कुटुंबांकडे एक हेक्टरपेक्षा अधिक जमीन आहे, अशांची ग्राममहसूल अधिकारी आणि पुरवठा निरीक्षक यांच्यामार्फत सखोल चौकशी केली जात आहे.

धान्य बंद, पण इतर योजना सुरू राहणार

या कारवाईबाबत स्पष्टीकरण देताना पुरवठा अधिकारी रसिक सातपुते यांनी सांगितले की, “ज्या रेशनकार्डधारकांचे धान्य बंद करण्यात आले आहे, त्यांच्या कार्डावरील केवळ धान्याचा लाभ थांबवला आहे. मात्र, या कार्डावर मिळणारे इतर शासकीय लाभ, जसे की ‘आयुष्मान भारत योजना’ व अन्य योजना, पूर्वीप्रमाणेच सुरू राहतील.”

गरजूंना मिळणार हक्काचा घास

अपात्र लाभार्थ्यांमुळे अनेकदा खऱ्या गरजू आणि गरीब कुटुंबांना धान्यापासून वंचित राहावे लागते. आता या कारवाईमुळे दरमहा वाचणारे १२४ क्विंटल धान्य तालुक्यातील खऱ्या अर्थाने पात्र आणि गरजू लाभार्थ्यांपर्यंत पोहोचवण्याचा मार्ग मोकळा झाला आहे. प्रशासनाच्या या भूमिकेचे सर्वसामान्य स्तरातून स्वागत होत असून, यामुळे रेशनिंग व्यवस्थेतील गैरप्रकारांना आळा बसणार आहे.